Wizara ya Maji imeongeza kasi ya juhudi za kutatua changamoto ya upatikanaji wa maji katika mji wa Karatu, kwa kuanza utekelezaji wa hatua za haraka za kupeleka fedha katika Mamlaka ya Majisafi na Usafi wa Mazingira Karatu ili kuhakikisha miradi yote inayoendelea inakamilika kwa wakati.

Akizungumza wakati wa ziara ya Waziri Mkuu wa Jamhuri ya Muungano wa Tanzania, Mheshimiwa Dkt. Mwigulu Nchemba (Mb), Naibu Waziri wa Maji, Mhandisi Kundo Mathew (Mb), amesema utekelezaji wa miradi hiyo utaleta mageuzi makubwa katika sekta ya maji wilayani humo, ambapo upatikanaji wa huduma unatarajiwa kuongezeka kutoka asilimia 52 ya sasa hadi kufikia asilimia 89 mara baada ya miradi kukamilika.

Amesisitiza kuwa Wizara inatambua kwa kina ukubwa wa changamoto ya maji katika mji wa Karatu, ikiwa ni pamoja na ongezeko la mahitaji ya huduma hiyo kutokana na ukuaji wa idadi ya watu na shughuli za kiuchumi. Kutokana na hali hiyo, Serikali imeweka kipaumbele maalum katika kuharakisha utekelezaji wa miradi ya kimkakati yenye lengo la kuhakikisha upatikanaji wa maji unakuwa wa uhakika, endelevu na unaokidhi mahitaji ya sasa na ya baadaye.

Kwa mujibu wa Naibu Waziri huyo, miradi inayoendelea inahitaji takribani shilingi bilioni 2.5 ili kukamilika kikamilifu, na hatua za kuhakikisha upatikanaji wa fedha hizo zinafanyika kwa dharura ili kuepusha ucheleweshaji unaoweza kuathiri utoaji wa huduma kwa wananchi.

Aidha, amebainisha kuwa Serikali ya Awamu ya Sita chini ya uongozi wa Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, imeendelea kuwekeza kwa kiwango kikubwa katika sekta ya maji kama sehemu ya ajenda pana ya maendeleo ya taifa, ikilenga kuboresha maisha ya wananchi kupitia upatikanaji wa huduma ya majisafi na salama.

Amesema uwekezaji huo si tu unalenga kupunguza adha ya upatikanaji wa maji, bali pia unachochea maendeleo ya kijamii na kiuchumi, ikiwemo kuboresha afya za wananchi, kuongeza tija katika uzalishaji, na kuinua ustawi wa jamii kwa ujumla.

Serikali imewahakikishia wananchi wa Karatu kuwa dhamira yake ni kuona kila mwananchi anapata huduma ya maji kwa ukaribu, ubora na uhakika, huku juhudi za sasa zikiwa ni sehemu ya mkakati mpana wa kuhakikisha huduma hiyo muhimu inawafikia Watanzania wote bila ubaguzi.